Hver var það sem sagði að það væri alltaf rigning á 17. júní? Það var alla vega þvílík bongóblíða í dag og glampandi sólskin. Við kíktum aðeins á Rútstúnið hérna í Kópavoginum og fengum fína 17. júní-stemningu beint í æð og fórum svo til Ömmu Dídí og fengum pönnukökur og rjómatertu. Alveg ekta 17. júní dag :)

Fyndnasta frétt dagsins er samt sú að það hafi liðið yfir nokkra vegna hita á Austurvelli. Ekki misskilja mig, ég er ekki það illa innrætt að það hlakki í mér þegar það líður yfir saklaust fólk úti í bæ. Mér finnst bara rosalega fyndið að það geti verið svo gott veður hér á landi, sérstaklega á 17. júní, að það líði yfir fólk vegna hita...