Nemandi minn lenti í því í dag að fá út 11 sem svar þegar hún lagði saman 8 og 5 á vasareikninum. Henni fannst þetta nú eitthvað bogið og bar þetta undir mig og reiknaði dæmið aftur. Þá að sjálfsögðu hætti vasareiknirinn allri vitleysu og sýndi 13.

Ég sagði henni frá draugunum sem fela sig í raftækjunum og gera alls kyns óskunda en láta sig svo alveg hverfa um leið og maður kallar á aðstoð, bara til að gera mann kjánalegan. Umræddir draugar eru stundum að stríða mér og láta eitthvað vera bilað í tölvunni, alveg þangað til ég kalla á Jóa til aðstoðar. Þá er aldrei neitt að.

Skilst að mamma hafi líka stundum orðið fyrir barðinu á draugunum og samstarfsfólk mitt hefur einstaka sinnum lent í svipuðu þegar ég er kölluð til aðstoðar.

Þetta er nefnilega ótrúlega útbreitt vandamál.

* * * * * * *

Annars er það nú helst af mér að frétta að ég var orðin ferlega slöpp þegar líða fór á vinnudaginn. Fór föl og fá heim kl. hálffjögur, lagðist upp í rúm og er nýskriðin fram úr. Hitastigið í kringum 37,5. Svo sem ekki mikið en nóg til að gera mann hálftuskulegan.

Planið er samt að hvílast bara vel í kvöld og geta svo mætt endurnærð í vinnuna á morgun. Það er nefnilega svo mikill vandi að vera ómissandi, þá getur maður ekki verið veikur heima...