Föstudagur - enn og aftur er komin helgi. Þær eru ótrúlega fljótar að líða þessar vikur! Fór í smá útréttingar eftir vinnu. Keypti svona hitt og þetta sem mig vantaði fyrir jólakortin og sótti nýtt debetkort í nýja Landsbankaútibúið mitt.

Verð að viðurkenna að ég kann alls ekki við nýja útibúið. Það var alltaf svo huggulegt og vinalegt að koma í Langholtsútibúið, manni fannst eins og allir þekktu mann (þó þeir gerðu það auðvitað ekki...). Nú hins vegar þyrmdi yfir mig þegar ég kom inn. Ég hef sjaldan séð svona mikið af fólki í banka! Ég tók mér númer fyrir gjaldkera og fékk númerið 413 en verið var að afgreiða nr. 375...! Sem betur fer áttaði ég mig fljótt á því að ég ætti ekki að tala við gjaldkera heldur þjónustufulltrúa svo að ég fór aftur að tækinu og tók réttan miða. Ég þurfti ekki að bíða neitt mjög lengi eftir þjónustufulltrúa en þegar ég var búin með erindi mitt og var að fara út þá var gjaldkeraröðin ekki komin nema yfir í 389! Sem betur fer þarf ég ekki að fara nema örsjaldan á ári í banka, nú til dags eru viðskiptin bara í gegnum Einkabankann.

En það var einn kostur (eða á ég að segja ókostur...!) á nýja útibúinu - það er í sama húsi og Rúmfatalagerinn. Ég álpaðist þangað inn, aðallega til að kaupa ný einnota aðventuljós í staðinn fyrir einnota aðventuljósin sem dóu fyrsta mánudag í aðventu. Rúmfatalagerinn í Holtagörðum er ein minnsta Rúmfatalagersbúðin en samt náði ég að bera út fullan poka af sætu jóladúlleríi! Guð forði mér frá því að villast inn í einhvern af stærri Rúmfatalagerunum þar sem jólaúrvalið er enn meira...! ;)