Ég mun seint ná að verða jafnöflugur bloggari og hún móðir mín , en maður verður nú samt að reyna að vera aðeins duglegri. Ef það eru ekki miklar annir og tímaskortur sem stoppa mig í að blogga, þá er það fréttaleysið sem truflar...

En í dag er ég með fréttir svo að það er tilvalið að koma með eina góða bloggfærslu :) Við Jói fórum nefnilega í hinn umdeilda þrívíddarsónar í dag. Við vildum gjarnan vita kyn barnsins í 20 vikna sónarnum og fengum í rauninni að vita það, en við treystum ekki alveg á upplýsingarnar eftir 1 og 1/2 sekúndu athugun á kyninu. Þar sem okkur langaði mikið í þrívíddarsónar þá ákváðum við bara að bíða og fá nánari staðfestingu þar.

Og viti menn, það kom jú sama svarið í dag - hér virðist vera um litla dömu að ræða. Eftir að hafa fengið sama svarið á tveimur stöðum, og mun betri athugun að ræða í þetta skiptið, þá ætlum við að treysta því að þetta sé lítil ungfrú og leyfa prjónaglöðum ættingjum að fara að redda sér bleiku garni. Ef svo ólíklega vill til að það fæðist síðan drengur í mars þá verður hann bara að vera metró-maður fyrst um sinn og klæðast bleiku ;) Verst að nú verðum við að hætta við að láta skíra Kaktus Ljósálfur, en þau nöfn sá ég að voru leyfileg á Mannanafnaskrá ;) hehe

Skvísan lék á alls oddi í sónarnum , spriklaði og baðaði út höndunum. Var alltaf að taka einhverjar pósur en við teljum að það hafi hún lært af sífelldu áhorfi foreldranna á America´s Next Top Model ;) En hún er samt líka greinilega kúrukerling eins og móðir hennar, því hún nuddaði sér upp við fylgjuna með hendur fyrir munninum og einmitt við lok skoðunarinnar ákváð hún að það væri komið nóg af fyrirsætupósum og sprikli, kúrði sig upp að fylgjunni og gaf áhorfendum til kynna að sýningunni væri lokið.

Ekki fleiri myndir takk!