Engin hollenska í kvöld - námskeiðinu var frestað og það byrjar ekki fyrr en næsta mánudag.

Fyrst svo stóð á, ákváðum við að skella okkur á Les poupées russes á frönsku kvikmyndahátíðinni. Sáum L´auberge espagnole á síðustu hátíð (eða var það þarsíðast?), vorum mjög hrifin og viljum því gjarnan sjá framhaldið.

Komum í Háskólabíó tímanlega til að ná myndinni kl. 17:30 (þessar kvikmyndahátíðarmyndir eru því miður ekki sýndar jafnoft og aðrar myndir) og komumst að því okkur til mikils ama að sýningin átti að vera í kústaskápnum í kjallaranum sem þeir kalla sal nr. 4. Ég hef áður lýst yfir skoðun minni á þeim sal og ætla ekki að gera það hér aftur, en læt mér nægja að segja að við hættum við að fara í bíó. Á fimmtudaginn er síðan önnur sýning á myndinni og þá í sal nr. 3, þannig að við frestuðum þessu bara.

Mér fannst samt frekar fúlt að fara bara heim, búin að dubba mig upp í pils og alles! Svo að við bara notuðum tækifærið og fórum á Madonnu. Þar var reyndar ekki alveg búið að opna og meðan við biðum þá röltum við yfir í Gallerí Fold og skoðuðum nokkur málverk. Ósköp listaspírulegt og skemmtilegt :) Sáum bæði flott málverk og ljót og göptum yfir verðinu á sumum þeirra. Þarna var meðal annars risastórt, blágrænt málverk með hvítum slikjum efst á aðeins 850.000 kr. Magnað...

Fengum góðan mat á Madonnu en þar sem fáir fara út að borða í kringum klukkan hálfsex á mánudagskvöldum þá höfðum við staðinn algjörlega út af fyrir okkur. Mjög ljúft :)

Þannig að það rættist úr kvöldinu eftir allt saman.