Við mamma tókum smá forskot á jólasæluna í dag og kíktum í Jólaþorpið í Hafnarfirði. Við kíktum í alla bása, versluðum smá og settumst svo inn á Súfistann til að fá okkur kakó og meðlæti. Það var reyndar leiðindareykjarsvæla þarna inni, en okkur var tjáð að reyklausa svæðið væri uppi svo við ákváðum að láta slag standa. Bárum svo kökusneiðarnar og kakóið upp og komumst þá að því að reyklausu borðin uppi voru bara fjögur og voru öll upptekin. Pínu fúlt hvað reyklausu svæðin eru oft höfð lítil og kúldrað niður á minna kósí svæðum innan kaffihúsanna. Mikið verður nú gaman þegar allt svona verður orðið reyklaust :)

Í gær var ég svo í fimmtugsafmæli. Tengdamamma hélt upp á þennan merkisáfanga með pompi og prakt. Ég sá um að vera hirðljósmyndari svo að hér má sjá fullt af myndum úr veislunni :)

Það voru líka skemmtilegir atburðir inni í miðri viku. Elísabet kom til mín á þriðjudaginn og við spjölluðum heilmikið saman. Á miðvikudeginum var afmæliskaffi hjá Lenu en þar fræddi Theó okkur um pandabirni í Atlanta sem hægt er að fylgjast með í gegnum vefmyndavél. Það sést nú ekkert akkúrat núna þegar þessi færsla er skrifuð, en það kemur vonandi fljótt aftur mynd. Þetta er ofsalega sætt, stór pandabangsi með lítinn pandabangsa :) Á fimmtudeginum var svo kennósaumaklúbbur hjá Jóhönnu og bara þrælfín mæting - mikið spjallað og borðað eins og við á :)

Um síðustu helgi var ég hins vegar á Selfossi en mamma sótti mig að lokinni bekkjarskemmtun á föstudagskvöldinu, en bekkurinn minn, 4. SJO, var að sýna söngleikinn um Mjallhvíti og dvergana ellefu við miklar og góðar undirtektir. Á laugardeginum fórum við í frænkuhitting hjá Dóru en þar voru frænkurnar úr móðurættinni minni samankomnar en við hittumst alltaf fyrir jól, og stundum páska. Síðan tók við mikill bakstur, en við mæðgur, ásamt Karlottu og Oddi, bökuðum bæði piparkökur og laufabrauð þessa helgi. Ég þurfti reyndar að stinga snemma af úr laufabrauðsbakstrinum á sunnudeginum því veðrið lofaði ekki góðu og ég vildi ekki verða veðurteppt. 

Sem sagt, nóg að gera hjá undirritaðri svo að vonandi fyrirgefið þið mér hvað ég er löt að blogga ;)