Fyrsti vinnudagur eftir jólafrí í dag. Verð að viðurkenna að þó það hafi svo sem ekkert gengið illa að koma sér fram úr (tvö auka "snús" samt...) að þá er ég búin að vera ósköp þreytt og sybbin í allan dag. Æ, það verður ágætt að komast aftur inn í rútínuna.

Ég ætla að halda aðeins áfram með Narníu-fílinginn með krökkunum, sem flest eru búin að sjá myndina í bíó. Við lásum Ljónið, nornina og skápinn fyrir jól en nú er komið að Kaspían konungssyni. Mig langar nefnilega svo að lesa Siglingu Dagfara fyrir þau (en það er þriðja og uppáhaldsbókin mín í flokknum) en fyrst verður maður auðvitað að lesa þær tvær bækur sem koma á undan.

Með áramótum kemur oft þörf á breytingum og við ákváðum í dag að bæta einhverjum sniðugum sósum inn í matargerðina hér í Betrabóli. Keyptum 4 mismunandi asískar sósur ásamt núðlum og gerðum fyrstu tilraunina í kvöld. Steiktum kjúkling og rækjur, suðum núðlur og skelltum einhverri girnilegri sjávarréttasósu yfir. Fyrst var þetta mjög gott. Svo var það gott. Svo byrjaði munnurinn á mér að loga. Ég gat ekki klárað minn skammt, heldur sat og þambaði hvert vatnsglasið á fætur öðru. Jóa líkaði maturinn betur, enda greinilega ekki sama kisan og ég þegar kemur að því að borða sterkan mat.

Vona að hinar sósurnar séu ekki svona sterkar...