Kannski rétt að ég láti ykkur vita af því að ég er búin að loka gestabókinni minni, eða réttara sagt, eiginmaðurinn lokaði henni fyrir mig. Það er að sjálfsögðu enn hægt að lesa eldri færslur, en ekki hægt að bæta neinu við.

Spam-óféti hafa verið dugleg að skrifa í hana til að láta mig vita af nýjustu klámmyndunum og typpastækkunarlyfjunum og það var orðið hluti af hinni daglegu tölvurútínu að eyða út rusli í gestabókinni sem og í orðabelgnum. Ég þrjóskaðist við að láta loka gestabókinni því ég vildi jú gefa ykkur tækifæri til að kvitta fyrir komuna.

Daginn sem ég þurfti hins vegar á einu bretti að eyða út tæplega hundrað ruslfærslum gafst ég upp og bað Jóa að loka fyrir.

Ég dunda mér hins vegar ennþá við að eyða út rusli í orðabelgnum, því honum vil ég alls ekki loka!

En sem sagt, ef þið hafið verið að reyna að skrifa í gestabókina og skiljið ekki af hverju það virkar ekki, þá vitið þið það núna - þar er allt lok, lok og læs og allt í stáli - a.m.k. þar til við finnum einhverja frábæra spamvörn fyrir hana.