Nemendur í Hlíðaskóla hafa verið með átak undanfarið í að halda skólalóðinni hreinni. Í hverri viku fer einn bekkur út og tínir rusl í poka. Minn bekkur átti þessa viku og ég ákvað að fara með þau út í ruslatínsluna í dag.

Það var ofsalega kalt en við klæddum okkur vel. Ég fann skærappelsínugulan og bláan kraftgalla í eigu skólans á kennarastofunni og hann hélt algjörlega á mér hita. Ég fann það bara á andlitinu og höndunum (þrátt fyrir hanska) hvað það var svakalegur kuldi.

Eitthvað fannst nemendum mínum þó kennarinn þeirra hallærislegur þegar ég kom askvaðandi niður af kennarastofunni í appelsínugula gallanum til að fara með þeim út. Ein stelpan fór að hlæja og tilkynnti mér að ég væri eins og ruslakall. Ekki að það hafi verið neitt illa meint gagnvart ruslaköllum ;) Ég skipti auðvitað í spekingslega fullorðinsgírinn og sagði að það væri mikilvægara að halda á sér hita en að vera smart ;) sem er auðvitað alveg rétt! Ég hugsa að ég hefði einfaldlega bara dáið ef ég hefði ekki verið í gallanum góða :)