Samkvæmt jólagjafahandbók Kringlunnar hefur sú skemmtilega hefð skapast hjá Kringlunni "að taka á móti jólapökkum fyrir jólabörn sem sett eru undir stóra jólatréð á fyrstu hæðinni".

Mér finnst þetta forvitnilegt og er að hugsa um að drífa mig og sjá þennan aragrúa af jólabörnum sem kúrir undir trénu á fyrstu hæðinni.

Svona getur einföld kommusetning (eða það er að segja skortur á henni) breytt fallegri frétt í algjört bull og vitleysu...

P.S. Vona að enginn haldi að ég sé að gera grín að hinu rétta innihaldi fréttarinnar, ég er að sjálfsögðu eingöngu að tala um setningafræðina sem virðist því miður ekki vera kennd lengur. Það ættu auðvitað allir að drífa sig að setja pakka undir tréð :) Sælla er að gefa en þiggja!

Uppfært 12. des.

Þegar ég skrifaði færsluna var ég að reyna að muna svona kommusetningarbrandara sem amma sagði mér einu sinni. Setningin úr brandaranum rifjaðist loks upp fyrir mér. Mig minnir að sagan hafi fjallað um kennara sem var að æfa nemendur í kommusetningu og setti eftirfarandi setningu á töfluna:

Hundar bitu menn og konur hlupu í burtu og geltu.

Nemendurnir áttu að setja kommu á réttan stað, en hinn rétti staður átti að sjálfsögðu að vera fyrir aftan "konur", þ.e.a.s.

Hundar bitu menn og konur, hlupu í burtu og geltu.

Sem sagt, þessir illkvittnu hundar bitu bæði menn og konur en hlupu síðan í burtu geltandi. 

Einhver sleppti þó alveg að setja kommu í setninguna en merking hennar varð þá í rauninni sú að hundspottin hefðu bitið menn en konurnar hefðu hins vegar hlaupið á brott geltandi.

Gaman að þessu ;)