Mikið rosalega finnst mér leiðinlegt þetta nýja kerrukerfi sem þeir notast við í nýja IKEA. Að mega ekki fara með kerruna sína út að bíl til að koma vörunum sínum fyrir og þurfa í staðinn að láta misathugula unglinga passa vörurnar sínar á meðan.

Var þarna á sunnudaginn að kaupa lítið borð í stofuna og var einnig með poka með ýmsu smálegu. Skildi kerruna eftir með poka og borði í höndum ungs pilts fyrir utan búðina meðan ég fór og sótti bílinn. Þegar ég kom aftur fann ég í fljótu bragði hvorki strákinn né kerruna mína. Rak síðan augu í kerruna og sá svo strákinn koma út úr búðinni. Ég spurði hann kurteislega hvort hann ætti ekki að standa hjá kerrunni minni meðan ég færi að ná í bílinn og hann hváði eins og hann skildi mig ekki og varð hálfvandræðalegur þegar ég spurði aftur og sagðist bara aðeins hafa þurft að fara inn. Ég varð hálfpirruð en ákvað að flýta mér bara inn í bíl áður en ég færi að láta það bitna á strákgreyinu.

Æ, ég er kannski bara svona skrýtin, en þó það séu nú ákaflega litlar líkur á að einhver steli vörunum mínum úr poka rétt á meðan ég sæki bílinn þá hafa nú fráleitari hlutir gerst. Og ef ég má ekki fara með kerruna mína út að bíl, þá vil ég líka að einhver standi allan tímann og fylgist með kerrunni.