Fékk virkilega skemmtilega nostalgíuafmælisgjöf þetta árið. Um daginn rifjaðist upp fyrir mér hvað mér fannst Bangsi Bestaskinn svakalega skemmtilegur. Við vorum aldrei með Stöð 2 á mínu heimili en þættina sá ég einstaka sinnum heima hjá Ástu vinkonu.

Fann þættina, mér til mikillar gleði, á Amazon og smellti þeim á óskalistann hjá mér. Amazon er með svolítið skemmtilegt sölutrikk, þegar maður er búinn að panta hjá þeim vöru eða setja á óskalista þá stinga þeir upp á svipuðum vörum til að freista manns. Eftir að Bangsi Bestaskinn var kominn á óskalistann birtist einmitt slík vara sem freistaði mín jafnvel enn meira en Bangsi Bestaskinn, fékk næstum tár í augun af heiftarlegu nostalgíukasti.

Þarna voru komnir Gúmmíbangsarnir, eða The Gummi Bears, sem einnig voru á Stöð 2 og það voru sko jólin þegar ég rakst á slíkan þátt hjá Ástu vinkonu eða í þau fáu skipti sem dagskráin var opin um mánaðarmót. Ég hoppaði hæð mína af gleði og bætti þeim á óskalistann með leifturhraða.

Báðar seríurnar eru nú komnar til mín, tveir diskar með Bangsa Bestaskinni (en þó aðeins 10 þættir samtals) og þriggja diska sett með 48 stuttum þáttum af Gúmmíböngsunum. Ég er búin með Bangsa Bestaskinn og hafði gaman af þó þættirnir séu reyndar mun smábarnalegri en mig minnti. Er aðeins byrjuð á Gúmmíböngsunum og þar er sko allt eins og mig minnti. Frábærlega skemmtilegir þættir sem verður gaman að horfa á.

Það hefði vissulega verið gaman að eignast þessa þætti með íslenskum texta svo Ragna Björk gæti notið þeirra seinna með mér, en börn eru nú ótrúlega seig að horfa á "útlenska" þætti. Sjálf átti ég enska, ótextaða spólu með Stjána bláa sem mér fannst gaman að horfa á, Karlotta horfði í sífellu á Disney-öskubuskuna á spænsku þegar hún var lítil og krakkar nú til dags elska að horfa á Cartoon Network þó þar sé enginn texti. Svo að ég hef litlar áhyggjur af textaleysinu.

Er stundum að velta fyrir mér hvort ég vex einhvern tímann upp úr því að horfa á teiknimyndir. Hef verið dugleg að kíkja á Disney Channel meðan ég er að gefa Rögnu Björk og er farin að kunna sýningartíma ákveðinna þátta utan að... Vissi svo ekki hvort ég ætti að vera stolt eða skammast mín í gær þegar við kíktum á Epic Movie á DVD og ég þekkti röddina í einni persónu þar, sem röddina sem talar fyrir aukapersónu í Lilo og Stitch... ;)