Lagt var af stað í hina langþráðu vetrarbústaðarferð í dag. Lena, Theó, Elva og Halla komu og sóttu mig um hálfátta en Hófí, Assi og Sigurjón voru á öðrum bíl. Báðir bílarnir voru vel troðnir enda farangurinn heldur mikill. Farangurinn var m.a.s. svo mikill að farþegar þurftu að fara út að ýta þegar farið var upp brekkuna upp í sumarbústaðarhverfið...en við vinkonurnar erum svo hörkuduglegar að við fórum létt með að skúbba bílnum upp brekkuna svo þetta var í góðu lagi.
Við vorum seint á ferðinni og stoppuðum á Selfossi til að fá okkur í svanginn. Það var því svartamyrkur mestalla leiðina (þrátt fyrir aðventuljósin í bílnum hennar Lenu). Sem betur fer ók Lena varlega og við komumst örugglega í bústaðinn. Því miður voru ekki allir jafnheppnir þetta kvöld. Í Kömbunum keyrðum við fram hjá bílum sem höfðu lent í slysi. Okkur var mjög brugðið og pössuðum okkur enn betur eftir þetta.
Við komuna í bústaðinn þreif Theó ísskápinn, Sigurjón lét renna í pottinn og við komum farangrinum fyrir. Að því loknu settum við nóg af nammi í skálar og spiluðum Gettu Betur og Theó var dómarinn. Við hin skiptum okkur í tvö lið, Elva, Assi og Sigurjón í öðru og síðan Lena, Hófí, Halla og ég í hinu. Fyrra liðið vann glæstan sigur og við hinar rétt náðum að hanga í skottinu á þeim með því að fá stig fyrir glæsileg skemmtiatriði.
Um 4-leytið skriðum við loks inn í rúm/í koju/á dýnu og flestir voru sofnaðir um 5- til 6-leytið.