Vonandi hafa allir sofið jafnvel út og við Jói. Við skriðum fram úr í kringum hádegi, í tæka tíð til að fara ásamt mömmu yfir til Guðbjargar þar sem boðið var upp á enn meiri mat og kræsingar.

Einhvern veginn tókst mér að lokka mömmu og Guðbjörgu til að spila Rummikub og skemmtu þær sér alveg jafnvel og ég við þá iðju. Meðan við spiluðum horfðu börnin á Jólastundina okkar. Oddur kom öðru hvoru til okkar og kvartaði yfir gráum "draumi" sem væri að hrella hann, þegar við kíktum kom í ljós að um var að ræða beinagrindarlegan, óhugnanlegan, gráan draug sem að okkar mati átti lítið erindi til lítilla barna á jóladag (eða yfirleitt á nokkrum öðrum degi). Vesalings Oddur hafði miklar áhyggjur af þessu og var viss um að draugurinn kæmi til hans þegar hann væri farinn að sofa. RÚV, hvað á þetta eiginlega að þýða???

Á leiðinni aftur heim til mömmu tókum við krók og komum við á Stokkseyri en eins og ég hef minnst á áður eru íbúarnir þar sérlega skreytingaglaðir.

Við mamma tókum svo eitt Scrabble þar sem við nenntum ekki að horfa á 10 Laxnessmyndir á RÚV. RÚV ekki að gera góða hluti þennan daginn!