Það var sannkölluð jólastemning í skólanum í gær. Kennararnir mættu allir í einhverju rauðu svo að kennarastofan leit helst út fyrir að vera samkomustaður jólaálfa. Hádegismaturinn var svo hamborgarhryggur með öllu tilheyrandi og m.a.s. ísblóm í eftirrétt. Við Ásta stóðum við ruslafötuna í matsalnum og björguðum tómum ísblómsboxunum frá nemendum. Eitthvað hlýtur að vera hægt að föndra úr þessum skemmtilegu boxum :)

Um kvöldið hittumst D-bekkingar á Tapas til að halda smá jólahóf. Ég var ekki mikið svöng og fékk mér því kjúklingasalat sem var virkilega gott. Næst langar mig samt að prófa marineruðu lambalundirnar í lakkríssósunni, það hljómaði eins og eitthvað sem ég myndi fíla.
Eftir matinn fórum við heim til mín til að hafa það huggulegt áfram og fara í okkar árlega jólapakkaleik. Einnig fylgdumst við með rugluðu Idoli með órugluðu hljóði. Fyrsta sinn sem ég sé Idolið og ég verð að viðurkenna að það greip mig ekkert rosalega. En kannski þarf ég bara að horfa á það óruglað.
Mér fór reyndar að líða frekar illa fljótlega eftir að við komum heim og var að farast í maganum mestallt kvöldið. Um leið og síðustu gestirnir fóru byrjaði síðan skemmtileg ælupest sem stóð yfir alla nóttina. Úff hvað það var lítið skemmtilegt. Deginum í dag hef ég síðan eytt hreyfingarlaus með hita uppi í sófa að horfa á video enda fátt annað í stöðunni þegar maður hefur ekki orku til að hreyfa sig.

Eins og Jói minntist á í færslu sinni í dag, þá urðu veikindi mín til þess að við misstum af því skírninni hans Snúra, sem hefur nú hlotið nafnið Ísar Logi Arnarson. Virkilega fúlt að missa af því. Ég sé heldur ekki fram á að fara í sunnudagaskólaafmælið sem ég minntist á um daginn, held ég reyni frekar að sofa út og vinna upp svefntap síðustu nætur.

Ég held að ég sé á þessari önn búin að fara í gegnum sama ferli og litlu börnin sem eru að byrja á leikskóla eða hjá dagmömmu í fyrsta sinn og taka upp allar pestir sem eru að ganga. Já, það er áhættusamt starf að vera kennari! ;)