Í dag fílaði ég mig eins og ég hefði verið flutt með tímavél yfir á gamaldags skrifstofu. Ég sat nefnilega úti í horni og vélritaði á límmiða. Já, ég vélritaði á ritvél, ekki lyklaborð. Það var glettilega skemmtilegt, sérstaklega þegar ég ýtti á enter-takkann og rúllan snerist og það heyrðist ping. Verst að ég kláraði allt sem þurfti að vélrita, það hefði verið svo gaman að vélrita meira á morgun...

Sólin lokkaði mig út aftur um leið og ég kom heim svo ég rölti út á videoleigu til að skila Jackie Chan. Ég tróð hálsklút ofan í handtöskuna mína þar sem ég óttaðist að mér yrði kalt en þurfti náttúrulega ekkert á honum að halda. Reif mig hins vegar úr peysunni sem ég hafði farið í og var bara á bolnum. Var fljót að koma mér út á svalir með góða bók þegar göngutúrnum var lokið og þar sat ég í hitanum þar til Jói kom heim. Ég dáist nú að dugnaðinum í honum, hann var að enda við að hjóla heim (upp í móti) í steikjandi hitanum og rauk svo bara beint út að slá grasið. Ég fór svo og hjálpaði honum smávegis við að raka. Svona til að verða að einhverju gagni ;)

Vonandi verður sól áfram á morgun, það er allt svo miklu skemmtilegra þegar sólin skín :)