Áhugavert... Ég fann mynd á netinu sem lýsir nokkurn veginn útsýninu sem blasti við mér þegar Jean-Claude var búinn að draga mig með sér upp á einhvern stjarnfræðilega háan fjallstind og það var komið að mér að renna mér niður. Þessi mynd er kannski ekki af nákvæmlega sömu fjöllum en svona leit þetta út og ég sá ekki einu sinni fram fyrir brekkuna og hversu brött hún væri.
Þó þessi hræðilega misheppnaða tilraun til að skíða í aðeins erfiðari brekku (ekki að mínu eigin frumkvæði!) hafi endað með martraðarrennsli á maganum niður ca. 200 m þar sem ég var á leiðinni að forða mér í lyftuna aftur, þá held ég samt að þetta hefði líklega endað verr ef ég hefði látið mig dreyma um að skíða þarna niður...!
Hér er plan af skíðasvæðinu öllu; hótelið okkar og aðalskíðabrekkurnar okkar voru þarna til hægri í Alpe D´Huez nálægt græna svæðinu.

Guðbjörg fékk að gista hjá okkur í nótt þar sem hún var að taka flugið snemma í morgun austur á Höfn í Hornafirði til að fara á námskeið. Við nýttum tækifærið systurnar og skruppum í verslunarleiðangur í Kringluna og horfðum síðan á video um kvöldið. Stórfínt :)

Í dag lauk ég mínum síðasta vinnudegi á St. Jósefsspítala. Sumarið er búið að vera ótrúlega fljótt að líða. Samstarfskonur mínar í móttökunni voru ótrúlega elskulegar við mig í dag (sem og alltaf :) ) og leystu mig út með svakalega góðri ostaköku sem við gæddum okkur á í morgunkaffinu og rósum þegar ég fór heim.

Jói var kominn heim úr vinnunni í kringum hádegi líkt og ég sökum veikinda. Og ég er ekki frá því að ég sé að verða veik líka. Svimar, er frekar kalt og alltof heitt, þvöl og með hausverk. Jæja, það þýðir víst ekki að fárast yfir því, best að ná þessu bara úr mér áður en ég byrja í skólanum á mánudaginn. Mömmu datt nú í hug að við Jói hefðum kannski bara fengið tölvuorminn ógurlega þó tölvurnar okkar hafi sloppið. Tölvur mömmu og Sigrúnar voru ekki jafnheppnar, þær smituðust af tölvuorminum og voru báðar undir tölvulæknishöndum Jóa í dag. Þær eiga nú að vera orðnar hraustar á ný. Kannski við getum kannski sótt eitthvað forrit á netið sem læknar okkur sjálf :) hahaha

Aldeilis skemmtilegur afmælisdagur sem Jói fær, slappur og veikur og síðan rigning og suddi í þokkabót! Úff! En hann kvartar ekki frekar en endranær ;)

Þar sem ég nennti ekki að hanga í tölvunni í kvöld með sljóan haus eða lesa eða gera neitt annað sem myndi á einhvern hátt reyna á slappar heilasellurnar þá komst ég á einhvern hátt út á videoleigu í kvöld og leigði mér The Never Ending Story og A Little Princess. Er búin að horfa á þá fyrrnefndu sem ég var að sjá í fyrsta skipti. Nei, nei, ekki hneykslast, það er ekki mér að kenna að ég sá hana aldrei þegar ég var yngri, ég var víst of ung til að sjá hana í bíó og svo varð aldrei úr að ég sæi hana á video... fyrr en núna. Ég las bókina að sjálfsögðu á mínum yngri árum og annað hvort er ég búin að gleyma svona miklu úr henni og er farin að rugla eða það vantaði heilan helling í myndina. Best að grípa bókina í næstu bókasafnsferð og rifja hana upp. Mér finnst boðskapurinn frábær, að það sé mikilvægt fyrir mennina að halda fast í ímyndunaraflið. Held ég gæti ekki verið meira sammála. Horfi síðan á Litlu Prinsessuna á morgun :)