Það er langt síðan áhugi minn á skrúðgöngum minnkaði svo ég lét öðrum eftir að þramma í rigningunni niður Laugaveginn meðan ég kúrði með Harry Potter nr. 4 uppi í sófa. Ætla að endurlesa hana áður en nr. 5 kemur eftir helgi (vonandi svo fljótt!). Það var því fátt sem minnti mig á að það væri hátíðisdagur í dag. Þegar ég henti öllu fína svínakjötinu af diskinum mínum þar sem kryddlögurinn á því gerði það óætt og borðaði í staðinn kex í kvöldmatnum flugu síðustu dreggjarnar af hátíðleika út í veður og vind. Ég sökkti mér bara dýpra ofan í Harry Potter enda er fjórða bókin nógu spennandi til að fá mann til að gleyma (mest)öllu hungri.

Já, það er víst betra að bíða bara róleg eftir löglegri útgáfu af Harry Potter nr. 5 svo maður lendi nú ekki í þessu ;) hehe

Rakst á heimasíðu bókanna sem Jói gaf mér en þar er að finna mjög góðan "skref-fyrir-skref"-leiðarvísi um hvernig best sé að teikna augu, andlit, hár, föt o.fl. í manga-stíl. Kíki nánar á þetta vopnuð teikniblokk, blýanti og strokleðri við fyrsta tækifæri.