Kíkti á Outlet-skómarkað X18 eftir vinnu í dag. Steinunn var í svo fínum skóm þaðan þegar ég hitti hana um daginn, götuskórnir mínir eru að verða úr sér gengnir og svo blasti við mér auglýsing frá þeim í blaðinu í dag. Svo ég fylltist óvæntri löngun til að fá mér skó (gerist sko ekki oft, reyndar eiginlega aldrei). Veit ekki hvern ég þóttist vera að plata, um leið og ég steig inn á markaðinn missti ég áhugann og nennti ómögulega að spá almennilega í hvort ég heillaðist af einhverjum skóm þarna. Það var reyndar fullt af flottum skóm og á góðu verði en mig langaði ekki í neitt. Mátaði eitt par sem passaði illa og þá nennti ég ekki meiru. Held það vanti algjörlega í mig þetta skógen sem virðist vera ríkjandi í flestu kvenfólki. Veit ekki hvort það er gott eða slæmt...

Kláraði svakalega lélega Chicklit-bók í kvöld :( Ja, ég get kannski ekki sagt að ég hafi klárað hana því ég hraðfletti og skimaði í gegnum rúmlega helming bókarinnar eftir að hafa pínt mig til að lesa fyrri helminginn. Leiðinlegar persónur, langdregnar lýsingar og lítill sem enginn söguþráður. Mæli með því að Chicklit-aðdáendur forðist þessa bók eins og heitan eldinn!