Fórum með alls kyns rusl í Sorpu í morgun. Þessar endurvinnslustöðvar Sorpu eru eins og lítill bær út af fyrir sig, dagblöð og tímarit í þessari götu, spilliefni í þessari götu o.s.frv. Ég fór að velta fyrir mér fyrirhöfninni sem færi í það ef maður flokkaði alltaf sorpið sitt í alla þá flokka sem þarna er um að ræða, líklega þó nokkur tími og fyrirhöfn fyrir utan plássið sem alls kyns sorpfötur á heimilinu myndu taka. En...þetta er víst framtíðin og ef maður vill eiga einhverja framtíð á jörðinni þá neyðist maður kannski til að fara að taka þátt í þessu...bara ekki strax ;)

Talandi um að bjarga jörðinni og íbúum hennar. Við villtumst óvænt inn á videoleigu í gær eftir Sorpuferðina og ákváðum því að leigja Spiderman sem við einhverra hluta vegna vorum ekki enn búin að sjá. Ég bjóst við svona ágætis afþreyingu enda lofuðu auglýsingarnar í sumar góðu en myndin fór alveg fram úr vonum mínum og stóð ég mig að því að liggja í hláturskrampa yfir mörgum bröndurum og bora nöglunum í lærin af spenningi. Mæli með Spiderman, þetta er sko fín mynd.