Við spiluðum veiðimann á táknmálsnámskeiðinu í dag. Spilaspjöldin voru með fatamyndum svo við gátum fest betur í minni táknin fyrir klæðnað og liti. Skemmtum okkur konunglega.
Það er heilmikið álag fyrir hinn dæmigerða kvenmann að fara á táknmálsnámskeið, það þarf nefnilega að steinþegja í einn og hálfan tíma í senn! ;)

Eftir vinnu fórum við Jói inn í Kringlu til að versla í matinn í Bónus. En Bónus missti af viðskiptum okkur út af heimskulegu innkaupakerrunum sínum, við vorum nefnilega ekki með 100kall á okkur svo við fórum bara annað og versluðum. Skil ekki af hverju þeir hætta ekki bara þessu klinkrugli með innkaupakerrurnar, það nenna hvort eð er fæstir að drösla kerrunum aftur yfir í Bónus eftir að bíllinn er hlaðinn af matvörupokunum og ekki eru þeir með neinar móttökustöðvar fyrir kerrurnar á bílaplaninu. Það er næstum hundraðkallsins virði að skilja kerruna eftir á planinu og bruna burt... næstum því ;) Sumir hafa reyndar mikið fyrir því að fara með kerrurnar sínar af planinu...en reyndar ekki yfir í Bónus. Það lá alla vega ein Bónuskerra á gatnamótum Flókagötu og Lönguhlíðar nú í lok síðustu viku. Mér þætti gaman að vita hver hafði fyrir því að koma henni þangað...!