Röddin var komin í sæmilegt ástand í morgun svo ég dreif mig af stað í skólann. Ekki var ástandið þó alltof gott, því eftir því sem ég þurfti að beita röddinni meira, þeim mun slakari varð hún og í síðasta tímanum fékk ég svo svakalegt hóstakast að ég hélt ég myndi hósta upp báðum lungunum. Sem betur fer var ég nógu sniðug að fatta að hafa með mér nokkrar kassettur með ævintýrum svo ég slapp við að lesa upphátt fyrir krakkana í nestistímanum.

Við Jói höfðum það kósí í kvöld (þrátt fyrir að ég héldi áfram að hósta upp lungum) og horfðum á nokkra Enterprise-þætti. Ég fór að hugsa það hvað ég er farin að sakna Voyager og reyndar Deep Space Nine líka. Ég datt út í 4. seríu af Voyager og í 6. seríu af Deep Space Nine. Þetta náttúrulega gengur ekki, held ég verði endilega að fara að gera eitthvað í þessu máli! Maður getur ekki verið þekktur fyrir að klára ekki seríurnar!!!