Þrælaði UHU-límstiftinu út í dag við að líma inn í ferlimöppuna. Ætla að reyna að klára hana sem fyrst og fara að einbeita mér að lokaritgerðinni sem ég hef ekki haft tíma til að kíkja á í lengri tíma.

Nú er hins vegar bráðum kominn tími til að skrúbba burt límið og gera heiðarlega tilraun til að reyna að vera sæt og fín því ég er að fara í afmælispartý til Báru.

Ég var svo þreytt eftir bíómyndina í gærkvöldi að ég bara steingleymdi að blogga áður en ég fór að sofa. Ekki er ég nú helsti aðdáandi kung fu bardagalistarinnar eða fótbolta en ég er samt alveg sammála Jóa varðandi matið á Shaolin Soccer, þetta var stórskemmtileg mynd sem virkilega gaman var að horfa á.

Ragna var með sýnikennslu í gær í að setja saman ferlimöppur fyrir samfélagsfræði og listir. Flott að komast í svona föndurtíma hjá Rögnu ráðagóðu ;)

Kvöldmaturinn í Betrabóli var ekki í lakari kantinum í gær. Ég keypti appelsínulamb í bakka, bjó til dýrindis sósu með smjörsteiktum sveppum og eldaði kartöflur með. Alveg einstaklega ljúffengt :)

Í dag heldur furðuveðrið frá því í gær síðan áfram. Undarlegt að veðurguðirnir geti ekki ákveðið sig hvort þeir vilji hafa glampandi sólskin og logn, grenjandi rigningu og rok eða öskrandi haglél. Haglélið er reyndar svolítið skemmtilegt þegar maður býr í risi því hávaðinn magnast um helming og maður kemst í mjög spes stemningu. Nema þegar haglélið kemur kl. hálfsjö á morgnana eins og í gærmorgun, þá er ekki eins gaman.