Kristján aðstoðarskólastjóri fyrirskipaði okkur Helgu að slappa af um helgina án þess að eyða orku í að hafa áhyggjur af byggingarmálum skólans svo ég bara hlýddi því og rölti í sólskinsskapi heim á leið. Grænt Miklatúnið heillaði svo ég beygði af leið og settist þar á bekk við hlið (h)eldri herramanns og þar sátum við tvö og spjölluðum um daginn og veginn en fljótlega bættust ung amma og lítil dama á bekkinn. Virkilega skemmtilegt að lenda í hrókasamræðum við bláókunnugt fólk úti á túni á sólskinsdegi. Held maður ætti að gera þetta oftar!

Tengdapabbi kom síðan og snæddi grillkvöldmat með okkur. Við erum því miður ekki búin að vera neitt sérlega dugleg að grilla í sumar, ef grillæðið mitt í byrjun júní er frátalið.

Áðan vorum við Jói á Sirkus í kveðjuhófi Vals sem er á leiðinni til Danmerkur í mastersnám. Reykur og hiti voru áberandi ókostir við staðinn og við fundum mest til með Regínu og ófæddum Arnarsyni eða -dóttur. Þegar við komum heim eftir hið stutta stopp á djamminu fundum við síðan til með Unni sem situr heima og þarf að læra.