Þvottadagurinn frá því í gær framlengdist yfir á daginn í dag, enda þurfti ég að setja átta sinnum í vélina og sólarhringurinn er aðeins 24 tímar. Ástæðan fyrir þvottaflóðinu eru miklar annir í síðustu viku þannig að lítið sem ekkert hafði verið þvegið í u.þ.b. tvær vikur. Það lá við að við værum farin að grafa upp fermingarfötin til að finna eitthvað til að vera í...! 

Til að koma mér á almennilegt skrið í lokaverkefninu sá ég að ég yrði að taka til í vinnuaðstöðunni. Ég náði því í elsku Cats-diskinn minn, stillti á hæsta, gólaði með og þóttist vera besta söngkona í heimi meðan ég gróf skrifborðið mitt upp úr drasli síðustu vikna. Ég verð alltaf jafnundrandi yfir því hvað borðið er stórt og rúmgott þegar ég er nýbúin að taka til á því...must be magic!

Tiltektin virkaði ágætlega, ég eyddi nokkrum klukkutímum í lífsleiknivinnuna mína og setti niður tæpa blaðsíðu :) Alls ekki slæmt.

Kannski maður noti aðferðina hennar Unnar og smelli bara atvinnuumsókn hérna á bloggið ;) Ég er einmitt í tvöfaldri atvinnuleit þessa stundina, er annars vegar á höttunum eftir sumarstarfi og hins vegar vantar mig kennslustöðu í vetur. Er reyndar mun bjartsýnni á hið síðarnefnda...