Fórum með 1. - 4. bekk í Húsdýragarðinn í dag. Sáum heilan helling af dýrum, allt frá refum, hestum og geitum yfir í geitunga. Þeir síðastnefndu fengu afar misjafnar móttökur, krakkarnir voru ýmist logandi hræddir við þá eða forvitnir um þessi skrautlegu skordýr. Þegar sumir minna nemenda sýndu áhuga á að klappa kvikindunum reyndi ég nú samt að beina athygli þeirra annað... Og alltaf lærir maður eitthvað nýtt, ég komst sem sagt að því að til að ná geitungabroddi út á að bleyta sykurmola með munnvatni þess sem er stunginn og leggja við broddinn. Þetta virtist alla vega virka þegar starfsmenn húsdýragarðins náðu broddi úr eyrnasnepli eins nemandans í mínum bekk... Verð að viðurkenna að ég var frekar þreytt eftir daginn þó við höfum skemmt okkur konunglega. Jói var svo góður að bjóða mér upp á pizzu hjá Hróa Hetti en ég sofnaði reyndar næstum því ofan í diskinn... ;)

Í kvöld sáum við svo Bruce Almighty sem ég hef ekki heyrt góða dóma um enn. En hún kom á óvart og var bara þrælfín að mínu mati. Kannski af því við vorum búin að heyra slæmu gagnrýnina um hana og vorum því ekki að búast við alltof miklu. Svo grunar mig einnig að margir þeirra sem ekki fíluðu myndina hafi kannski verið að búast við nýrri Cable Guy eða Ace Ventura. Flott að sjá Jim Carrey svona temmilega eðlilegan í mynd ;) þó ég fíli samt líka fíflalætin í honum :)