Já, var búinn að gleyma því að það var öskudagurinn í dag :) Við Helga komum við í 11-11 í Skipholti á leiðinni úr Listgreinahúsinu yfir í höfuðstöðvarnar og vorum að velta því fyrir okkur hvort við gætum fengið hádegismat þar ef við myndum syngja eitthvað af lögunum sem Helga Rut kenndi okkur í morgun. Miðað við fýlusvipinn á kassadömunni, sem var einmitt að hlusta á hóp barna syngja þegar við komum inn, þá spái ég því að það hefði ekki gengið... ;) Og þetta var kl. 11:15 í upphafi vinnudagsins - hversu fúl ætli hún hafi verið orðin í lok dagsins? Fyndið að fólk skuli ekki geta feikað smá bros og gleði þennan eina dag ársins sem krakkar fá að klæða sig í grímubúning og syngja sér inn sælgæti, þó það sé kannski þreytandi að hlusta á sama gaulið í marga klukkutíma. Þetta er nú bara einu sinni á ári!

Jæja, var lítið duglegri í dag en í gær. Í staðinn fyrir að drífa mig snemma heim úr skólanum í dag og læra fyrst að það féll niður tími, þá eyddi ég nokkrum tímum í leti ásamt Hildu og Helgu uppi í skóla við að útbúa ofboðslega skemmtilegt boðsbréf til D-bekkjarins á kennaramót ársins og svo sátum við og kjöftuðum saman inni í matsal. Æ, það var ósköp gott, við notum alltof lítinn tíma nú til dags í að liggja í leti og spjalla saman, við erum alltaf svo uppteknar :( Svo við áttum þetta bara alveg skilið svona einu sinni! :)

Uppgötvuðum það í morgun í tíma hjá Helgu Rut að við á yngri barna kjörsviðinu getum vel sungið - alla vega svona allar saman í hóp sem kór. Erum hins vegar ekki eins spenntar yfir því að eiga syngja einsöng í næsta og þarnæsta tíma þegar við eigum að fara að kenna hver annarri lög...

Ég myndi vilja tileinka öllum föndurglöðum stúlkum í Kennó Hroll dagsins. Strákar, hættið að stríða okkur! Hvað með það þó okkur finnist gaman að föndra og dúlla við hlutina?!? ;)