Fyrsta æfing fyrir lokaatriði árshátíðarinnar var haldin í Hafnarfirði í dag. Mikið væri nú ljúft ef það væri hægt að gera öll atriðin fullkomin til sýningar án þess að maður þurfi að mæta á æfingar, ég veit alltaf um fullt annað sem ég myndi vilja gera annað. En það eru nú bara tæpar tvær vikur í árshátíðina svo þetta er nú ekki mjög alvarlegt vandamál.

Gerði svolítið í dag sem ég geri ekki oft, ef yfirleitt nokkurn tímann! Fór í kaffitímanum í bakarí til að kaupa eitthvað gott handa okkur Jóa. Bakaríið í Austurveri varð fyrir valinu en þar fylgdist ég með afgreiðslustúlkum kýta og hálfhvæsa hvor á aðra og fór síðan út með einn vesælan snúð því það sem ég ætlaði að kaupa var ýmist ekki til eða fannst ekki í bakarínu.

Jæja, kannski það væri ekki galið að koma sér snemma í rúmið. Ég hef ráfað um með hausverk, svima og hita/kuldaköst frá því um eftirmiðdaginn í dag en eins og vanalega þegar líðanin er þannig er þetta allt án hækkaðs hita. Ég er nefnilega svo (ó)heppin að ég fæ yfirleitt ekki hita...