Það er auðvelt að geta upp á umræðuefnum Íslendinga í dag. Hugsa að flestum hafi orðið tíðrætt um hitabylgjuna ógurlegu. Ég var fegin að þurfa ekki að mæta neins staðar í vinnu, heldur gat notið sólarinnar og hitans alveg í botn!

Klæddi mig í ermalausan bol og dreif mig í göngutúr rúmlega tíu. Gekk niður Arnarsmárann, gegnum undirgöng yfir að Fífunni, framhjá andatjörninni, gegnum undirgöng undir Hafnarfjarðar-/Reykjavíkurveginn og gekk svo meðfram strandlengjunni eftir endilöngu Kársnesinu yfir að smábátahöfninni. Þar sótti Jói mig því ég ætlaði að taka bílinn. Myndavélin var með í för og tók ég ansi margar myndir, af náttúru, skiltum og fleiru sem mér fannst koma vel út á mynd.

Ég skutlaði Jóa í vinnuna en tímdi ekki að sitja áfram í bílnum. Skildi hann því eftir á bílastæði við Þjóðarbókhlöðuna meðan ég fór smá hring í vesturbæ Reykjavíkur. Hélt áfram myndatökum þar og afraksturinn má sjá hér.

Fór heim og sótti sunddótið mitt og lokkaði Helgu Sigrúnu með mér í Árbæjarlaugina. Þar var pakkað af fólki og kannski engin furða í veðurblíðunni. Það jafnast ekkert á við að busla í vatni í svona heitu veðri. Eftir svamlið fórum við í Bakarameistarann í Húsgagnahöllinni og fengum okkur í svanginn enda báðar orðnar glorhungraðar.

Ég sótti Jóa í vinnuna um fimmleytið, við skruppum í smá útréttingar og svo í Árbæinn. Vorum svo heppin að lenda þar óafvitandi í grillveislu. Við Björk sátum úti í garðinum eftir matinn í lengri tíma og spjölluðum saman meðan Jói og Teddi horfðu á fótboltaleik innandyra.

Á leiðinni heim fórum við í Álfheimaísbúðina í Fákafeni og kældum okkur niður.

Afar góður dagur! :)