Nú er ég hrædd um að Sigrún vinkona skammi mig...
Ég lagði af stað í búðarrápsleiðangur, aðallega til að kaupa mér nýjar buxur. Planið var að kaupa ekki gallabuxur í þetta skiptið en samt einhverjar svona sterkar og góðar buxur sem ég gæti notað í vinnuna (það er ekki hægt að vinna með 6 ára börnum í hvernig buxum sem er!). Ég byrjaði á því að fara í Zikzak tískuhús sem er, eins og ég hef áður nefnt, algjör draumabúð fyrir mig. Já, ég var sem sagt alveg búin að gíra mig inn á að skoða vel allar buxur nema gallabuxur, en hvað haldið þið að ég hafi séð um leið og ég kom inn... Gallabuxur, alveg eins og elsku uppáhaldsbuxurnar mínar (sem ég á þegar tvennar af...). Matlock-syndrómið gerði strax vart við sig. Ég mátaði til að vera viss um að þetta væru sömu buxurnar og mátaði líka fullt af öðrum "ógallabuxum". "Ógallabuxurnar" pössuðu hins vegar engan veginn...og ég fór út með tvennar buxur í viðbót af draumabuxunum mínum og á nú fernar eins. Ég veit, ég veit, ég á að vera aðeins frumlegri en ég veit að þessar eru þægilegar og góðar og æðislegar og svo framvegis. Og ég lofa að halda áfram að leita að buxum sem ekki eru gallabuxur! :) Í staðinn var ég bara pínulítið frumlegri í efri pörtum og keypti mér þrjá flotta boli.