Stefa bjargaði kvöldinu hjá mér. Colin Firth náði ekki að knýja fram bata (ótrúlegt!) svo að ég sendi Jóa til að fá Sex and the City-þættina lánaða hjá Stefu. Maður verður að vita hvað "all the fuzz is about"... ;) Já, ég skal viðurkenna það, ég hef aldrei horft á Sex and the City. Sá fyrsta þáttinn með öðru auganu þegar þeir byrjuðu en síðan ekki söguna meir. En þá bjargar það manni að eiga vinkonu sem á fimm fyrstu seríurnar á DVD :)

Af heilsunni er það helst að frétta að ég dundaði mér við það á tæplega klukkutímafresti í alla nótt að vakna upp með andfælum í miðju hóstakasti þar sem ég bjóst við að annað eða bæði lungun kæmu upp úr mér í heilu lagi. Færði mig fram í stofu um fjögurleytið svo að Jói greyið fengi nú einhvern svefnfrið.
Hóstaköstin eru enn jafnslæm en koma aðeins sjaldnar. En ég tek engan séns, er núna að búa um mig á bedda inni í stofu því ég ætla ekki að hafa það á samviskunni að halda vöku fyrir háskólanemum sem eru á leiðinni í próf í fyrramálið!
Er að vona að ég fái einhvern svefn og að ég vakni með tæran og heilbrigðan háls og komist í vinnuna...