Mér líður eins og ég hafi farið inn á veitingastað og pantað nautasteik með bakaðri kartöflu.
Eftir að hafa beðið óheyrilega lengi eftir matnum kemur þjónninn fram með kaldan hafragraut og skellir fyrir framan mig.
Mig langar ekki í grautinn enda pantaði ég nautasteik. Svo að ég sendi diskinn aftur inn í eldhús.
Nokkru síðar kemur þjónninn fram aftur en nú er hann búinn að setja tvö kirsuber ofan á kaldan grautinn. Hann segir mér að ég geti sætt mig við grautinn eða beðið í næstum tvöfaldan þann tíma sem ég hef þegar beðið til að fá óvissurétt hússins. Á honum eru gæðatakmarkanir en húsreglur kveða á um að óvissurétturinn sem ég fái eigi að líkjast rétti hjá einhverjum óþekktum matargesti í húsinu en megi samt ekki vera jafnflottur og réttirnir sem ég sé á diskum flestra annarra gesta.

Nú er ég í vanda stödd.
Mig langar ekki í þennan kalda graut en ég er orðin virkilega svöng og það er ekkert sem tryggir að óvissurétturinn verði betri en kaldi hafragrauturinn, gæti jafnvel verið verri. Það er alla vega öruggt að hann mun ekki komast í hálfkvist við steikina sem ég pantaði upphaflega.
Hvað á ég að gera?