Já, eins og Jói greinir frá í færslunni sinni þá vorum við að skrifa undir kaupsamninga kl. 13 og kl. 15 í gær, fyrst fyrir Flókagötuna og svo fyrir Arnarsmárann. Þetta er allt að ganga upp svo að nú get ég bara farið að einbeita mér að því að hlakka til og undirbúa flutningana. Einhver sem á lager af góðum flutningapappakössum? :) Það er ótrúlega stuttur tími þangað til júlí mætir á svæðið. Helga, þú getur byrjað að hita salsasósuna ;) hehe

Til að halda upp á viðskiptin fórum við á Madonnu. Maturinn var ljúffengur en ég er eiginlega komin með leið á hálfmánapizzum, held mig við þær flötu næst.
Eftir matinn skruppum við í Videoland Daða og náðum okkur í nokkrar spólur. Horfðum á Van Wilder sem er einmitt með leikaranum sem mér finnst alveg eins og Daði :)

Í dag gerði ég heiðarlega tilraun til að fara með gamla geisladiska í Safnarabúðina á Frakkastígnum. Kom þangað fimm mínútur fyrir tvö og sá að það er opið milli kl. 14 og 18:30. Beið í 10 mínútur og gafst svo upp. Sem betur fer, því þegar ég prófaði aftur hálffjögur þá var enn allt lokað og læst. Skil ekki alveg þjónustuna þar á bæ.

En í millitíðinni fór ég og fékk mér ís og hafði það huggulegt. Varð síðan fyrir stórmerkilegri reynslu á skómarkaði X-18 úti á Granda. Eitthvað sem ég hef aldrei upplifað áður. Ég fann mörg pör af skóm sem mig langaði í, a.m.k. fjögur pör! Mamma trúði mér varla þegar ég sagði henni frá þessu. Ég er nefnilega ekki mjög hefðbundin kvenmaður hvað skó varðar, finnst leiðinlegt að kaupa skó og finn sjaldan skó sem mig langar í. En sem sagt, þarna fann ég sportlega skó sem þarf ekkert að reima, maður smeygir sér bara ofan í þá, og svo voru rosa flottir reimaðir skór í nokkrum litum. Og gallinn var að mig langaði í þá í 3 mismunandi litum! :S Keypti eldrauðu skóna en er enn að hugsa um þessa bleiku því þeir smellpassa við allar bleiku peysurnar sem ég á og bláa parið var líka rosalega sætt. Úff hvað þetta var erfitt! (Á örugglega eftir að laumast þangað aftur á morgun og kaupa þessa bleiku, uss, ekki segja neinum...).

Fyrsti grillmaturinn í Betrabóli bragðaðist mjög vel áðan. Grillið svínvirkar og svínakjötið líka :)

Þar sem ég er hugsa skiljanlega mikið um launabaráttu kennara um þessar mundir þá hitti þessi teiknimyndasaga beint í mark! ;)

Það sorglega er samt að ég held að hún sé sönn... :(