Ég fór skyndilega að hugsa um það áðan hvað það er í raun og veru undarlegt að 29. febrúar skuli ekki vera almennur frídagur. Þessi dagur er ekki til nema á fjögurra ára fresti þannig að honum ætti að sjálfsögðu að eyða við skemmtileg hátíðahöld. Finnst ykkur það ekki? :)

Hilda og Eysteinn eru búin að setja upp barnalandssíðu fyrir hann Rúnar Inga. Það er nú ekkert smá sem litli kappinn er sætur :)

Þorrablót að hætti Hlíðaskóla fór fram í hádeginu í dag. Krakkarnir voru óhemju dugleg að smakka á herlegheitunum, hvort sem það var súrt slátur eða hákarl. Kennslukonan reyndi líka að vera dugleg og smakkaði súra hrútspunga, lundabagga og súra sviðasultu en komst að því hún ætlar að halda sig við venjulega lifrarpylsu og harðfisk... Hákarlinn fór ekki inn fyrir hennar varir enda er það takmarkað hvað hægt er að leggja í að smakka mikið í 15-20 mínútna hádegishléi þegar einnig þarf að borða sig saddan. Hins vegar læddist hákarlslyktin um allan skólann og þrátt fyrir að kennslukonan sé komin heim þá situr lyktarkeimurinn enn í fötum hennar og vitum.