Mjólkursamsalan var að dreifa fótboltum til krakka þegar ég var í Bónus um daginn. Ég kunni ekki við að biðja Klóa kókómjólkurkött um bolta fyrir "börnin mín", fannst það eitthvað halló ;) En ég hringdi í MS í dag og spurði hvort við gætum ekki fengið nokkra bekkjarbolta í skólann, a.m.k. fyrir 1. bekk. Það var ekkert mál og ég mátti bara koma og sækja þá. Þeir gáfu mér 6 bolta svo að það er nóg fyrir alla 1. og 2. bekkina :) Hlakka til að mæta með þetta í skólann á mánudaginn (og pumpa þá upp). Við þökkum MS hér með kærlega fyrir :)

Við Stefa fengum okkur sundsprett í Laugardalslauginni í dag og ég testaði nýju sundgleraugun mín sem eru sko með alvöru sjónglerjum með styrkleika. Þvílíkt gaman að geta loksins séð eitthvað í sundi :) Það var reyndar ekkert spennandi að sjá hvað vatnið var skítugt, en o jæja ;) Mikið var nú líka gott að fara í sund með nýju klippinguna mína, ég var komin með alltof mikinn lubba.

Eftir kvöldmat gölluðum við Jói okkur upp og fórum í göngutúr í Öskjuhlíðinni. Sáum ekkert af goðsögnum Öskjuhlíðarinnar ;) en ég held reyndar að ég hafi fundið eina kanínuholu. Það var yndislegt veður þó ekki væri glampasólskin, tilvalið að rífa sig upp og skella sér í göngutúr :)