Leit við á Kaffi Roma í gær til að heilsa upp á Unnstein og gæða mér á hinum yndislegu veitingum sem þarna er að fá. Fékk mér hálft grillað panini með kjúklingaskinku, grænmeti, osti og sinnepssósu og í eftirrétt fékk ég mér hið sígilda snickers-stykki (eins konar kaka, ekki bara súkkulaðið!) og sviss mokka með leyniviðbót ;) Mmmm, ótrúlega gott!

Hélt svo áfram í frændsystkinahittingum en við Jói skelltum okkur á Kalla og sælgætisverksmiðjuna ásamt Heiði, Bjarka og Angelo (nýja frændanum okkar).

Fyrri hluta myndarinnar sat ég með gleðitár í augunum og kökk í hálsinum yfir því hve stórkostleg myndin er. Ég er einlægur aðdáandi Roalds Dahl, og þá sérstaklega þessarar bókar, og er mjög ánægð með þessa kvikmyndaútgáfu af henni. Eftir hlé var ég nú aðeins búin að jafna mig og það var líka um það leyti sem hallaði oggu pínu pons undir fæti. Það truflaði mig pínulítið að kvikmyndin skuli bæta inn einhverri aukasögu um barnæsku Villa Wonka, en það var ekki einn stafur um neitt slíkt í bókinni. Mér fannst það skemma pínulítið fyrir. Þrátt fyrir það finnst mér myndin frábær og ætla mér að kaupa hana á DVD um leið og hún kemur út. Húrra fyrir Tim Burton! :)

Meðan auglýsingarnar rúlluðu, áður en myndin byrjaði, gerði ég mér grein fyrir að framundan eru heilmikil kvikmyndahúsaútgjöld hjá mér. Þvílík veisla sem framundan er! Það eru a.m.k. fimm myndir væntanlegar sem mér leist virkilega vel á. Fyrst má nefna "Ljónið, nornina og skápinn". Þær bækur voru líka meðal minna uppáhaldsbóka þegar ég var yngri, líkt og Kalli í sælgætisverksmiðjunni, og ég hlakka mikið til að sjá hvernig þær taka sig út á hvíta tjaldinu. Ég vona bara (ef myndin verður góð) að þeir kvikmyndi alla seríuna og þá bíð ég sérstaklega spennt eftir Siglingu Dagfara, sem mér fannst alltaf langskemmtilegust.

Önnur ævintýramynd sem var auglýst er "Five children and it". Mig rámar í að hafa einhvern tímann séð brot af gömlu þáttunum og þetta lítur út fyrir að vera ágætis skemmtun fyrir börn og barnalegt fólk eins og mig :)

Fyrir þó nokkru síðan sendi Jói mér auglýsinguna fyrir "Valiant" og ég er viss um að það er hægt að fá harðsperrur í magann af hlátri við það að horfa á hana. Hún virðist alla vega lofa góðu.

Jói sendi mér líka auglýsingu fyrir "The Corpse Bride" sem ég efast ekki um að sé frábær. Hún er alla vega greinilega sama augnakonfektið og "Nightmare Before Christmas" sem ég elska elska elska og hlakka mikið til að horfa á einu sinni enn í desember næstkomandi.

Sú mynd sem ég hlakka mest til og mun telja dagana þar til kemur (btw það eru 67 dagar þar til hún kemur...) er að sjálfsögðu "Harry Potter 4 - The Goblet of Fire". Ég sat stjörf og fékk gæsahúð við það eitt að horfa á auglýsinguna á bíótjaldinu. Það lá við að ég færi að hágráta af einskærri lotningu. Jú, þið sem ekki vissuð það nú þegar þið vitið það þá núna - ég er einlægur Harry Potter aðdáandi. Megi J.K.Rowling lengi lifa og lengi skrifa og megi vera gerð stytta henni til heiðurs!

Ég er búin að skella eitthvað af teikningunum mínum inn á myndaalbúmið. Þetta er samt ekki nema brot og ég á eftir að skanna fullt meira inn.
Þegar síðan mín verður búin að ganga í gegnum massívar útlitsbreytingar þá verður sérkafli þar með teikningunum, en þangað til ætla ég að leyfa ykkur að skoða þær á myndaalbúminu :)