Vikan hófst á skemmtilegum D-bekkjarsaumaklúbb :) Við vorum 7 í klúbbnum svo að það var bara ágætis mæting. Við ræddum allt milli himins og jarðar og ég held að við höfum minnst talað um skólamálin! Alltaf gaman þegar það tekst ;)

Á þriðjudeginum kom elsku Unnsteinn minn heim :) Ég er samt ekki farin að hitta hann enn :( þar sem heilsan hefur ekki verið upp á sitt besta eins og lesa má um hér að neðan. Alltaf sami dugnaðurinn í Unnsteini, eftir að hafa eytt tveimur sólarhringum í að ferðast á milli heimsálfa, þá mætti hann á miðvikudeginum í skólann og er byrjaður að vinna í Hagkaup. En við þurfum endilega að hittast. Ætti að vera nokkuð auðvelt enda getum við eiginlega veifast á milli húsa þrátt fyrir að búa í hvort í sínu bæjarfélaginu ;)

Þessi vika hefur aðallega einkennst af bragðvondri hálsbólgu og leiðinda lumpu. Ekkert óvenjulegt við það svo sem þegar hálf þjóðin liggur með inflúensu. Á fimmtudeginum var ég komin með smávegis hita en eins og samviskusömum kennara sæmir þá mætti maður auðvitað í skólann og svo beint á vinnutengt námskeið í 3 klukkutíma. Á föstudeginum mætti ég meira af vilja en mætti í skólann og samstarfsfólk mitt skammaði mig fyrir að vera ekki bara heima í rúmi. Enda var það litla þrek sem ég átti uppurið á hádegi en þá hringdi ég í riddarann á hvíta hestinum sem kom og sótti mig. Ég fór strax að sofa og svaf í rúma fjóra klukkutíma. Langt síðan ég hef sofið svo lengi á miðjum degi.
Samt er þetta svona eins og vanalega hjá mér, mér líður eins og ég sé með 38 - 39 stiga hita en er bara með rétt tæplega 37,5. Ég man eiginlega ekki hvenær ég fékk alvöru hita síðast.
Í dag er ég svo búin að vera að lufsast eitthvað hérna heima. Horfði á upptöku af CSI og á Cartoon Network. Var samt líka pínu dugleg og fór yfir fullt af heimavinnu, útsetti lög í tölvunni og æfði Scott Joplin á píanóið.
Nú er hitinn hins vegar á uppleið og nálgast 38. Vonandi er það bara af því ég var að spila á píanóið. Tek því rólega núna :)