Henríetturnar hittust yfir hvítvínsglasi síðastliðið föstudagskvöld. Við erum líka ósköp duglegar húsmæður svo að við vorum eiginlega með Tapas-hlaðborð og gæddum okkur á Quality Street konfekti yfir Idolinu. Ósköp huggulegt! Er strax farin að hlakka til næsta hittings :)

Í gær lá leið okkar Jóa síðan í Bíóhöllina í Álfabakka til að sjá Harry Potter. Ákváðum að láta það eftir okkur að sjá myndina í Lúxussalnum. Við sáum nr. 2 líka í Lúxussalnum en lentum þá í því að fá bara sæti fremst í salnum þrátt fyrir að mæta hálftíma fyrir sýningu. Núna vorum við því komin klukkutíma fyrr, vopnuð skáldsögum til að stytta okkur biðina. En nú var hins vegar ekki hleypt inn fyrr en tíu mínútum fyrir sýningu svo að við sátum og lásum í tröppunum við hliðina á miðasölunni í u.þ.b. klukkutíma. Það mættu nú alveg vera einhver sæti á biðsvæðinu, ég segi nú ekki annað.

Myndin var mjög góð þó ég sakni auðvitað ótal atriða úr bókinni. En það er víst ekki hægt að gera henni allri skil í 2 og 1/2 tíma mynd. Er reyndar sammála ýmsum sem skrifað hafa gagnrýni á IMDB að Dumbledore var mjög undarlegur og taugatrekktur í myndinni sem er mjög langt frá karakter hans í bókunum, en þar er hann yfirleitt alltaf pollrólegur og með kontról á hlutunum. En jæja, ég er samt mjög ánægð með myndina og hlakka til að sjá hana aftur þegar hún kemur á DVD.

Ætla ekki að fárast hérna yfir fólkinu sem var með 4-5 ára gömlu stelpuna í bíó. Þetta er ekki barnamynd og verði foreldrunum bara að góðu þegar barnið fer að vakna upp af martröðum um miðjar nætur... Myndin er bönnuð innan 12 ára og ég skil ekki að fólk skuli ekki virða það. Auðvitað er skárra að fullorðnir horfi með börnum þegar þau horfa á skelfilegar myndir til að geta útskýrt fyrir þeim að þetta sé bara leikið, en það breytir því þó varla að börnin eru samt að horfa á hryllinginn sem festist svo í huga þeirra.

En jæja, ég ætlaði ekki að fárast yfir því svo að ég sleppi því bara... ;)

Í dag var svo innflutnings-/afmælisboð hjá Önnu Kristínu og Andreasi. Nýja íbúðin þeirra er ótrúlega fín og falleg og það var gaman að hitta þau og fleiri góða vini og kunningja yfir gómsætum kökum og gotteríi. Stefa var meðal gesta og skammaði mig fyrir það hvað ég blogga sjaldan. Svo að ég þorði ekki öðru en að setjast beint við tölvuna og blogga þegar ég kom heim...! ;) Skal reyna að vera dugleg, Stefa mín :)