Lögreglan telur hátíðarhöld um verslunarmannahelgina almennt hafa gengið vel fyrir sig. Þó er fjölskylduhátíðin "Sælukot 2005" almennt talin hafa borið af.

Jón Jónsson lögreglustjóri segist aldrei hafa þurft að skipta sér af gestum hátíðarinnar.

"Þetta er furðulegt fólk upp til hópa, en þau virðast alltaf skemmta sér vel saman án þess að til nokkurra vandræða komi," sagði Jón og brosti. "Mig hefur alltaf langað til að lauma mér inn í fjörið til þeirra en ég vil fyrst læra að spila Megasarlögin á banjóið mitt svo ég geti tekið þátt í hópsöngnum af einhverju viti."

Hátíðargestir beittu enn á ný hinum undarlega galdri sem kenndur er við fimm fíla í Volkswagen. 28 manns snæddu kvöldverð inni í samkomuhúsinu og þegar kvöldvakan stóð sem hæst voru yfir 30 manns staddir inni við söng og gleði. Sælukot hefur verið stækkað frá því árið áður en samt eru eðlisfræðingar enn jafnundrandi á því hvernig fjölskyldunni tekst að yfirfylla húsið gjörsamlega á hverju ári án þess að nokkur troðist undir.

Eftir miðnætti var kveikt í hátíðarbrennunni úti á túni. Eldur logaði glatt og brustu hátíðargestir fljótlega í söng. Þrír hrossagaukar og einn spói flugu skelfingu lostnir á brott, en talið er þó að þeir hafi frekar verið að flýja sönginn en eldinn. Þeir svöruðu ekki símtölum blaðamanns í dag svo að þetta hefur ekki fengist staðfest.