Þrátt fyrir kulda og snjókomu var bíllinn ekki pikkfrosinn í morgun eins og svo oft. Ég var mjög sátt við að komast strax inn enda foreldradagur framundan og heilmörg viðtöl á dagskrá.
Hins vegar var ég ekki nógu sátt við hljóðin sem bíllinn gaf frá sér þegar við lögðum af stað.
Flabbflabbflabb.
Jói stoppaði bílinn, fór út og skoðaði dekkin en allt virtist í orden. Svo við héldum áfram.
Flabbflabbflabb varð að plankplankplank sem varð svo að klankklankklank.
Okkur leist ekki á blikuna, hvað þá þegar við vorum komin út á Hafnarfjarðarveginn þar sem er nú ekki beinlínis hægt að dóla sér á 30 þó bíllinn segi klankklankklank.
Við keyrðum út í kant rétt fyrir neðan Hamraborgina. Jói kíkti aftur á dekkin og jú, eitt dekkið var illilega sprungið.
Jói hringdi á dráttarbíl en ég hringdi á leigubíl. Leigubíllinn var sem betur fer fljótur að koma, ég skildi Jóa eftir í klankklank-bílnum í vegarkanti á Hafnarfjarðarveginum og rétt náði í fyrsta foreldraviðtalið.
Hafði ekki alveg planað að byrja daginn svona en gamla máltækið "fall er fararheill" hlýtur að vera satt því dagurinn gekk mjög vel fyrir sig að öðru leyti hjá mér.
Samt dæmigert að svona lagað gerist einmitt þegar eitthvað stendur til.

Af hverju í ósköpunum er öllum óvæntum dagskrárliðum Ríkissjónvarpsins troðið á miðvikudaga kl. átta?!? Hvers eigum við Bráðavaktaraðdáendur að gjalda?
Fyrst var það handbolti sem skemmdi fyrir mér miðvikudagskvöld. Síðan íslensku tónlistarverðlaunin, sem ég hafði svona álíka áhuga á og handboltanum. Í kvöld var það Gettu Betur.
Og alltaf fellur Bráðavaktin niður. Ég hefði haldið að það mætti frekar hvíla þetta blessaða Óp eða hvað svo sem þetta heitir.
Ég var farin að halda að Bráðavaktarserían væri kannski búin en nei, nei, síðasti þáttur fyrir þremur vikum var nr. 17 af 22 svo að það eiga enn að vara fimm þættir eftir. Miðað við að Gettu Betur er búið að hertaka miðvikudagskvöldin þá sé ég ekki fram á að fá neina Bráðavakt fyrr en fyrsta lagi í lok mars.
Er ekki sátt :(