Ég tók að mér að fara með luktirnar í kirkjugarðana þetta árið þar sem við mæðgur höfðum ekki erindi sem erfiði þegar við reyndum að fara með þær á föstudaginn.

Þar sem það rigndi í morgun og hitastigið var yfir frostmarki ákvað ég að gera fyrstu tilraun í dag. Hafði með mér hamar til að negla luktarprikin ofan í jörðina og sjóðandi heitt vatn á hitakönnu til að bræða frostklumpa úr blómavösunum. Náði á einhvern undraverðan máta að troða mér í hlífðarbuxurnar mínar, sem náði reyndar ekki nema upp að bumbu og sátu því ákaflega undarlega.

Byrjaði í Fossvogsgarðinum og þurfti reyndar ekki á heita vatninu að halda því klakaklumpurinn í vasanum var alveg bráðnaður, en hamarinn kom hins vegar að góðum notum og luktin komst á sinn stað í frosna jörðina. Reyndar fannst mér ekki alveg nógu fallegt í kringum leiðið - þarna eru svo miklar dældir að stórir og miklir pollar myndast, og starfsmenn (eða aðrir?) aka greinilega yfir grasið framhjá leiðunum á stórum og þungum vinnutækjum því þarna eru djúp og leiðinleg hjólför.

Því næst fór ég í Gufunesgarðinn en þar var jörðin ekkert minna frosin. Gallinn var hins vegar sá að ég gat ekki tekið prikið af luktinni til að negla það niður svo að luktin fór aftur með mér heim. Það voru því bara blómin og grenið sem urðu eftir þar. Um það leyti sem ég var að gefast upp við að reyna að pota luktinni niður byrjaði allsherjar haglél, þannig að ég fór bara út í bíl og var fegin að komast úr alltof þröngum hlífðarbuxunum sem ég var nú búin að ganga niður skálmarnar á í báðum kirkjugörðunum.

Þetta fór því ekki alveg allt samkvæmt áætlun. Gengur bara betur næst :)