Við Jói áttum eins árs brúðkaupsafmæli í gær og gerðum okkur smá dagamun eins og fram kemur hér, en við horfðum á fótbolta og tölvuteiknaða bíla, borðuðum kínamat og lágum í leti.

Í dag höfðum við hins vegar allan heimsins tíma, Jói tók sér frí úr vinnunni og við lékum túrista í Reykjavík. Við byrjuðum á því að fara á Landnámssýninguna sem er að finna undir Hótel Reykjavík Centrum. Flott sýning og skemmtileg uppsett.

Röltum síðan aðeins um miðbæinn, fengum okkur langlokur á Hlölla-bátum og skoðuðum ljósmyndasýninguna á Austurvelli áður en við hoppuðum aftur upp í bíl og færðum okkur yfir í Perluna. Þar gengum við í gegnum Sögusafnið með góða leiðsögn í heyrnartólum. Kom mér á óvart hversu flott safnið eiginlega er - mjög áhrifamikið og flott. Vaxmyndirnar virkilega eðlilegar - ég starði lengi í augun á þeim og beið eftir að þær blikkuðu og skammaðist mín hálfpartinn, því það er jú dónalegt að stara á annað fólk... Brá reyndar svolítið þegar ég tók eftir því að Snorri Sturluson andaði.

Eftir þetta vorum við orðin pínu lúin í löppunum og fórum heim. Endurhlóðum batteríin og mættum síðan kl. sjö á Argentínu þar sem við fengum himneskan mat, enda ekki við öðru að búast af snillingunum þar.

Frábær dagur! Bíð spennt eftir næsta brúðkaupsafmæli ;)