Það gengur náttúrulega ekki að láta skamma sig fyrir bloggleysi svo að það er víst best að koma með smá pistil ;) hehe

Á laugardagskvöldið fórum við til Arnar og Regínu og hittum þar einnig Val og Helgu og barnaskara mikinn :) Við snæddum saman kjöt, grænmeti og osta eldað á raclette og steikarsteini. Mmmm, ég fæ vatn í munninn við tilhugsunina :)

Að öðru leyti fór helgin að mestu í að græja nýja föndurherbergið mitt :) Við tókum svefnsófann úr gestaherberginu og ætlum að reyna að selja hann (vantar einhvern svefnsófa?;)) og ég fór í IKEA og keypti í staðinn ódýrt en veglegt skrifborð. Gestaherbergið heitir því núna föndurherbergið - enda komu aldrei neinir gestir til að gista í því hvort eð er ;) Nú get ég því málað, teiknað, skorið, klippt og límt án þess að þurfa að dreifa úr mér út um alla íbúð. Hef reyndar ekki haft tíma til að vígja herbergið ennþá, en labba öðru hvoru framhjá og dáist að því hvað allt er enn snyrtilegt og fínt þar inni. Ég segi "enn" því ég þekki nú sjálfa mig og mína hæfni (eða á ég að segja vanhæfni?) til að halda skrifborðum skipulögðum ;)

Tengdi líka gömlu fermingargræjunar hans Jóa við hátalara. Þær hafa staðið inni í gestaherberginu í meira en ár en aldrei verið tengdar. Nú ætla ég hins vegar að henda gömlu fermingargræjunum mínum sem eru með ónýtu kassettutæki, eru fyrirferðarmiklar og gera ekki annað en að spila geisladiska og útvarpið. Í staðinn get ég notað hátalarana frá þeim fyrir Jóa græjur, sem vissulega eru eldri en mínar, en hafa þó þann yndislega kost að geta spilað gamaldags plötur og ég á þó nokkrar gamlar plötur sem mér þykir vænt um og finnst gaman að hlusta á.

Þeir sem eiga gamlar plötur en engan plötuspilara eru velkomnir í heimsókn til að hlusta á plötur. Boðinu fylgir hins vegar það skilyrði að viðkomandi verður að föndra meðan hann hlustar, enda er plötuspilarinn inni í föndurherberginu ;)