Trúarfólk úr öllum áttum virðist hafa miklar áhyggjur af andlegu ástandi heimilisfólks Betrabóls.

Fyrir nokkrum vikum barst inn um lúguna blaðsnepill á ensku sem hvatti okkur alvarlega til að gerast grænmetisætur í nafni Guðs. Á blaðinu voru taldar upp ýmsar ástæður þess að við ættum snarlega að snúa lífi okkar við og sleppa öllu dýrakjöti og því til stuðnings voru litlar teiknifígúrur af ýmsum dýrum sem sögðust elska okkur afar heitt og grátbáðu okkur að þyrma þeim. Neðst voru svo nokkrir tenglar sem áttu að fræða okkur nánar um þetta nýja líferni og ein síðan bar nafnið "beint samband við Guð".

Blaðið endaði í ruslinu ásamt tómum plastbakka undan vænum sneiðum af svínakjöti úr kjötborði Nóatúns.

Fyrir síðustu helgi barst okkur svo auglýsing um landsmót votta Jehóva. Þangað áttum við að mæta til að læra að forðast siðleysi og komast að öllum sannleikanum um "lausnina í nánd". Einhverra hluta vegna vorum við ekkert spennt að fara, kunnum greinilega alveg ágætlega við eigið siðleysi. Amma mín fékk einu sinni heimsókn frá vottum Jehóva sem buðu henni inngöngu í Paradís. Hún spurði á móti hvort þeir væru með sérstakt umboð fyrir ferðir þangað. Ekki tókst þeim að frelsa hana ömmu mína og því miður koma þeir einnig að lokuðum kofanum hér á bæ.

Mismunandi trúflokkar eru bara af hinu góðu, en það væri fínt ef þeir gætu leyft okkur að vera í friði með okkar trú og trúleysi. Ef okkur langar að gerast grænmetisætur Guðs eða vottar Jehóva þá höfum við samband. En þið þurfið svo sem ekkert að bíða við símann, það er ekki á dagskránni neitt á næstunni.