Eftir brunchinn hjá Elvu á laugardeginum, kíktum við Hófí í Ráðhúsið á pólskan markað sem haldinn var í tengslum við pólska menningarhátíð sem stóð yfir um helgina. Við urðum því miður fyrir vonbrigðum því markaðurinn var einfaldlega ekki til staðar. Það eina sem við fundum var klippimyndasýningin (sem var sko sannarlega þess virði að sjá - alveg mögnuð listaverk þar á ferð!) og borð þar sem hægt var að fá óteljandi ferðabæklinga um Pólland og aðallega borgina Kraká eða Krakowa.

Í dag frétti ég svo að ef við hefðum verið u.þ.b. einum og hálfum tíma fyrr á ferðinni þá hefðum við líka getað fengið pólskar pylsur og séð börn dansa pólska þjóðdansa. En þrátt fyrir það þá finnst mér þetta nú ekki alveg uppfylla þau skilyrði að kallast markaður... Ég nennti reyndar ekki að prófa aftur í gær, sunnudag, en kannski var aðalmarkaðurinn þá?

En þetta var samt skemmtileg upplifun og pólska nemandanum mínum, sem einmitt er frá Kraká þótti heilmikið varið í alla bæklingana sem ég mætti hlaðin með í skólann í dag.