Það var nóg um að vera þessa helgina og mér leiddist alla vega ekki.

Píanóið mitt fékk fyrsta flokks þjónustu á laugardeginum, en Kristinn kom og stillti það fyrir mig. Píanótónarnir eru því undurfagrir núna, þ.e.a.s. ef ég hefði haft einhvern tíma til að spila um helgina ;)

Á laugardagskvöldið hélt Ívar, móðurbróðir Jóa, upp á fertugsafmælið sitt á NASA. Þar var mikið um dýrðir eins og við mátti búast og skemmtiatriðin frábær. Jói komst því miður ekki með mér því hann var aftur orðinn lasinn, en ég ákvað samt að skella mér og fór með tengdamömmu og co.

Í dag var það svo Borgarleikhúsið með mömmu, Karlottu og Oddi, en við drifum okkur á Ronju Ræningjadóttur. Ég hafði lesið frekar slaka dóma um sýninguna í Fréttablaðinu að mig minnir og var því ekki alveg viss hvort ég ætti að koma með. Leikmyndin var víst ómöguleg og leikararnir svona la la. Ákvað samt að skella mér með og dæma þetta sjálf, enda ekki alltaf að marka dóma leikhúsmógúlanna. Ég er fegin því að hafa ekki tekið mark á neikvæðni gúrúanna, því sýningin er frábær! Og ekki veit ég hvað var verið að fussa og sveia yfir ljótri leikmynd, ég hef sjaldan séð betur útfærða leikmynd. Allar útfærslur voru reyndar góðar, hvort heldur sem um var að ræða Helvítisgjána, rassálfa, grádverga, fljótsprottin blóm eða annað. Leikurinn sjálfur var líka til fyrirmyndar og ekkert út á hann að setja. Mæli hiklaust með Ronju Ræningjadóttur!

Á morgun byrjar hins vegar ný vinnuvika svo að ekki dugar að vaka fram á rauða nótt.

Sofið rótt! :)