Fyrsti sunnudagur í aðventu í dag. Ég býst við að flestir aðventukransaeigendur hafi kveikt á Spádómskertinu í dag, a.m.k. vona ég að Jóhanna, Elva, Halla, Lena og Theó hafi kveikt á kerti í flottu aðventukrönsunum sem þær föndruðu síðastliðið föstudagskvöld. Við Assi vorum reyndar ekkert í krönsunum og dútluðum okkur bara í pappírsföndri á meðan þær skvísur töfruðu fram hvern glæsikransinn á fætur öðrum.

Ég notaði daginn í að skreyta heimilið fyrir jólin. Jói náði fyrir mig í jólaskrautið neðan úr geymslunni (ég er soddan prinsessa þessa dagana að ég læt bera allt fyrir mig ;) hehe) og ég dundaði mér við það í dag að pota jólasveinum og snjókörlum hér og þar. Að sjálfsögðu með jólatónlistina í eyrunum! :) Skil reyndar ekkert hvað þau voru að kvarta yfir Jólahjólinu síðasta föstudagskvöld, í hvert skipti sem spilarinn minn kom að því lagi í dag komst ég í banastuð! :)

Það er ekki alveg allt tilbúið samt, ég á t.d. eftir að kaupa (eða finna hérna heima...) tvær 50 ljósa seríur fyrir herbergin - skil ekki alveg hvað hefur orðið af þeim frá því í fyrra... ætli þær hafi ekki bara verið orðnar ónýtar? Ætla að ná mér í ódýrar seríur í Rúmfatalagernum, vona bara að allir hinir hafi ekki verið á undan mér og séu búnir með marglitu seríurnar - alltaf frekar fúlt þegar það gerist...

Í gær vorum við í afmæliskaffi hjá tengdapabba. Tengdaforeldrar mínir eiga bæði afmæli sama dag , 29. nóvember, og oftast höfum við kíkt í tvö afmæliskaffi sama kvöldið. Núna hélt tengdamamma hins vegar upp á sitt um síðustu helgi með svaka veislu, því hún varð fimmtug þetta árið, en tengdapabbi var hins vegar með kaffiboð um miðjan daginn í gær.

Nú eru hins vegar ekki fleiri viðburðir framundan fyrr en jólahittingur D-bekkjarins 16. desember - jú, og líka videokvöld með henni Stefu minni einhvern tímann sem fyrst, en okkur hefur gengið eitthvað erfiðlega að finna laust kvöld þar sem undirrituð er búin að vera upptekin út í eitt undanfarið! Ef ég er að gleyma einhverju öðru sem ég á að mæta á nú á næstu vikum þá megið þið gjarnan minna mig á það :)