Stórglæsileg árshátíð Hlíðaskóla fór fram í gær í safnaðarheimili Háteigskirkju. Mætingin var mjög góð og ég held að allir hafi skemmt sér konunglega rétt eins og ég gerði. Maturinn var góður, fólkið frábært og skemmtiatriðin stórfyndin. Ég á eftir að lifa á þessu lengi!

Í dag sváfum við svo fram eftir og ég er búin að slæpast um á náttfötunum langt fram eftir degi, borða pizzu og popp og horfa á stelpuvideo. Ekki leiðinlegt ;)

Ég komst reyndar að því í gær, þegar ég ætlaði að smeygja mér í spariskóna og leggja af stað á ballið að spariskórnir mínir eru formlega ónýtir. Ég ætlaði að fara að þurrka af þeim þegar ég komst að því að framhlutinn á öðrum þeirra er rifinn og leðrið undir tánni lyftist upp þannig að það sést í brúnt fóðrið. Að sjálfsögðu reyndi ég bara að líma þetta niður með tvöföldu límbandi en það virkaði takmarkað. Svo sá ég að það var ekki bara þetta, þeir voru allir hálftrosnaðir og ljótir. Svo stóð eitthvað hvasst stykki upp úr og stakkst í ilina og virtist ákaflega líklegt til að rífa sokkabuxurnar áður en ég kæmist á ballið.

Og þetta eru nýju spariskórnir mínir! Ég fékk mér þá þegar ég útskrifaðist úr Kennó vorið 2003 svo að ég er bara búin að nota þá í tæp þrjú ár og nú eru þeir ónýtir! Algjör skandall ;)

Sem betur fer náði ég að redda mér í gær og fór bara í hvítu brúðarskóna. Það þýddi reyndar að ég þurfti að fara úr dökkum kjólnum sem ég hafði valið og svörtu sokkabuxunum og skipta yfir í ljósari klæðnað. Það var svo sem allt í lagi - það er nóg af litríkum og ljósum fötum í fataskápnum mínum ;)

Nú stend ég hins vegar frammi fyrir því leiðinlega vandamáli að þurfa að fara í skóleiðangur til að leita mér að nýjum spariskóm! Get sko vel sagt ykkur að það er ekki það skemmtilegasta sem ég geri! Kannski get ég farið í búðina sem ég keypti hina skóna í og gáð hvort það er ennþá til eins skór - þeir voru svo þægilegir og góðir :)