Menningarlífið blómstrar þessa dagana. Dreif mig aftur á leiksýningu í kvöld en nú fór ég ásamt Helgu og Rakel að sjá "Lífið - Trylltur dans" á fjölum Hlíðaskóla. Unglingarnir fóru á kostum í ótrúlega metnaðarfullri sýningu. Virkilega flott hjá þeim!

Það eina sem truflaði var að salurinn var gjörsamlega orðinn súrefnislaus löngu áður en kom að hléi. Við Rakel náðum að halda í okkur lífi með því að blaka leikskránum framan í okkur. Hugsa að það hefði verið hægt að raka inn svimandi háum fjárhæðum með því að selja blævængi eða litlar rafhlöðuknúnar viftur í hléinu...

Fyrir þá sem hafa gaman af góðum söng, flottum dönsum, hafa skopskynið í lagi eða vilja kynnast hörðum heimi út frá sjónarhóli unglinga, þá eru enn tvær sýningar eftir - ein á laugardaginn kl. 16:00 og síðan viðbótarsýning sem ég veit því miður ekki hvenær er. Kostar bara 1.000 kr.