Nemendur mínir eru um það bil að klára skólaárið og bekkjarfulltrúarnir skipulögðu grillveislu í gær í Fjölskyldu- og húsdýragarðinum í tilefni af því. Mér var boðið að taka þátt og ég þáði það með þökkum, enda þykir mér óskaplega vænt um þennan fyrsta nemendahóp minn.

Þó ég hafi nú verið leyst út með þvílíkt veglegum gjöfum þegar ég byrjaði í orlofinu í febrúar, þá komu þau mér samt á óvart í gær og færðu mér alveg dásamlega gjöf. Valdar höfðu verið myndir úr öllu myndaflóðinu sem ég hef tekið af krökkunum í gegnum tíðina til að prenta í ljósmyndabók hjá Hans Petersen. Einnig hafði hver og einn nemandi samið sérstaka kveðju til mín en þær voru prentaðar inn á milli myndanna. Ég táraðist þegar ég fletti í gegnum bókina og aftur þegar ég skoðaði hana þegar ég kom heim. Það snertir mann alveg ótrúlega djúpt að vita að störf manns séu svona vel metin.

Þó ég eigi eftir að kenna heilmörgum krökkum í gegnum tíðina þá mun fyrsti bekkurinn alltaf eiga alveg sérstakan stað í hjarta mínu.

Við stilltum okkur upp fyrir myndatöku og að venju var tekin grettumynd í lokin. Það tilheyrir nefnilega hjá okkur :)